Inatsit tunngaviusoq

Ernereernermi sulinngiffeqarnermut inatsit tunngaviusoq naatsumik ataani nassuiarneqarpoq.

 

Sukumiinerusumik paasissutissanut Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaat nr. 5 19. novembari 2020-meersoq atuarneqarsinnaavoq.

 

Ernereernermi ullormusiat il.il.

Ernereernermi ullormusiaqartitsineq pisarpoq ernisimalluni sulinngiffeqarnermi isertitaqarunnaarsimagaanni. Ullormusiaqarsinnaatitaaneq akissarsiaqarlutik sulisunut, namminersortunut taakkulu aapparisaannut pilersueqataasunut soorlu aalisartunut, piniartunut savaatilinnullu aammalu ilinniagaqarsimallutik naammasserlaanut ilinniarnissamullu ilinniarfinnut aalajangersimasunut qinnuteqarsimasunut atuuppoq. Ullormusiat annertussusaat ilinniagaqarsimanngitsunut akunnermut aki ilanngaatitaqanngitsoq malillugu annerpaamillu sapaatip akunneranut akunnernut 40-nut annertussusilinnut naleqqussagaavoq.

 

Ernereernermi ullormusianut atuutsinneqartut tassaapput:

 

·            Naartusoq erninissamut naatsorsuutigisamit sapaatip akunneri sisamat sioqqullugit sulinngiffeqarsinnaatitaavoq.

·            Meerartaarnermi anaanaasoq ernereernerup kingorna sapaatip akunnerini 15-ini sulinngiffeqarsinnaatitaavoq kiisalu marlulissanik meerartaarnermi imaluunniit amerlanerusunik meerartaarnermi ernereernerup kingorna sapaatip akunnerini 19-ini sulinngiffeqarsinnaatitaalluni.

·            Ataataasoq meeqqap/meeqqat inunngoreerneranniit sapaatip akunneri pingasut sulinngiffeqarsinnaatitaavoq.

·            Angajoqqaat, tassa imaappoq nammineq toqqakkamik angajoqqaajusoq, meerartaarnermi ernereernerup kingorna aamma sapaatip akunneri 21-t sulinngiffeqarsinnaatitaavoq kiisalu marlulissanik arlalinnilluunniit meerartaarnermi ernereernerup kingorna aamma sapaatip akunneri 25-t sulinngiffeqarsinnaatitaalluni (angajoqqaat sulinngiffeqarsinnaanerannut inatsit malillugu).

 

Taamatuttaaq qitornavissiartaarnermi aamma meeqqamik ulloq unnuarlu paarsinermi meerartaarnermut atatillugu sulinngiffeqarnermi ullormusiaqartitsisoqartarpoq.

 

Sulinngiffeqarnermi piffissap sivisussusaa 2009-mili arlaleriarluni allanngorsimavoq, tassaallunili kisitsisaataasivimmi tabelit ukioq aallartiffiat.

 

2021-p qeqqani ernereernermi aningaasaateqarfik pillugu malittarisassat nutaat atuutsinneqalerput. Tamanna ilutigalugu suliffeqarfinni namminersortuni sulisut ernereernermi sulinngiffeqartarnerat inatsit malillugu aningaasaateqarfimmit aningaasalersorneqalerput ernereernermi ullormusianit ingerlanneqarunnaarlutik.

 

Nalunaarsuutit tunngaviusut aamma suliarineri

Pisortat akissarsialeriviannit nalunaarsuutit kiisalu Naatsorsueqqissaartarfiup innuttaasunut nalunaarsuiffianit nalunaarsuutit tunngavigalugit kisitsisitigut paasissutissiortoqarpoq.